【有片】艾拉狂寸英格蘭　一句話激死英迷

即上歐國盃專頁，每日重心提供盡在《彩報》：https://win.on.cc/　

英格蘭將於周四(8日)凌晨歐國盃4強主場對丹麥，「三獅兵團」球星如雲，加上有地利優勢，自然被睇高一線。不過，曾經效力英超球隊曼聯、韋斯咸嘅法國名宿艾拉唱反調，更加諷刺英格蘭對上一次捧盃，已經耐到恐龍仲未絕種，認真寸嘴。

艾拉退役之後，近年轉行做「網紅」，經常拍片放上社交網，佢近日又有傑作，寸英格蘭太耐冇捧盃：「所有人都等咗好耐，英格蘭上次贏冠軍，恐龍仲生存緊。」英格蘭史上唯一一次大賽冠軍，已經係1966年世界盃，又難怪畀艾拉寸爆。

不過，英格蘭今屆歐國盃表現出色，5戰取得4勝1和，並保持不失球，加上4強及決賽都有主場之利，好有機會打破55年錦標荒。