【歐國盃決賽】巴西輸波　英格蘭命運危？

即上歐國盃專頁，每日重心提供盡在《彩報》：https://win.on.cc/　

今屆美洲國家盃主辦國巴西佔有地利優勢之下，卻以0比1不敵阿根廷，可見決賽有主場之利唔係大晒。因此，嚟緊周一(12日)凌晨歐國盃決賽，英格蘭喺主場溫布萊球場迎戰意大利，隨時可能歷史重演。

事實上，踏入千禧年之後，已經出現多次大賽決賽，主場一方反而輸波，包括2004年歐國盃決賽，主辦國葡萄牙0比1不敵希臘，爆出當年球壇最大冷門，初出茅廬嘅C朗悲哭場面，相信唔少球迷仍然歷歷在目。

上屆歐國盃決賽，C朗上半場傷出，葡萄牙反而踢到加時以1比0擊敗東道主法國，同樣令人跌爛眼鏡。

2012年歐聯決賽，大熱門拜仁慕尼黑擁有主場之利，面對陣容不整嘅車路士，被車仔臨完場逼和1比1，最終互射12碼，拜仁仲輸埋，夠晒經典。

值得一提，相隔9年之後，車路士再次奪得歐聯冠軍，意大利又係繼2012年後，再打入歐國盃決賽，可唔可以反客為主擊敗英格蘭呢？大家拭目以待。