慘中二奶魔咒　尼馬哭崩求安慰

即上歐國盃專頁，每日重心提供盡在《彩報》：https://win.on.cc/　

巴西喺美洲國家盃決賽0比1不敵阿根廷，賽後球星尼馬喊爆，要對手兼好兄弟美斯安慰。尼馬過去1年慘中「二奶宿命」，頻頻喺主要賽事居屈亞軍，好似行緊美斯以前條舊路。

尼馬2017年入「門」，雖然曾經為PSG捧過唔少盃，但近2季連接遭到打擊做「阿二」，包括2020年歐聯決賽不敵拜仁慕尼黑，上季法甲被里爾搶走聯賽冠軍寶座，三連冠走勢斷纜，來到今場美洲盃決賽，巴西不敵阿根廷，尼馬慘成「三亞王」。

因此，巴西輸波之後，尼馬立即哭成淚人，美斯同效力PSG嘅中場里安度柏利迪斯都主動上前安慰尼馬，美斯更同尼馬相擁一段長時間，令呢位好兄弟平復心情。

尼馬今屆美洲盃射入2球，至今為巴西隊攻入68球，僅少過球王比利9球，屬於「森巴兵團」史上入波第2多嘅球員。不過，尼馬出道以來只為巴西捧過2013年洲際國家盃冠軍，冇乜大賽命。