魔人現身！留喺多蒙特操住先

足球博彩神器，每日重心提供盡在《彩報》：http://win.on.cc/football/　

多蒙特周一(12日)開操日「失蹤」嘅「魔人布歐」艾寧夏蘭特，周三亮相訓練場，並自拍放上網表示已經歸隊，至於佢轉會車路士一事，可以暫時放埋一邊。

挪威冇份參加歐國盃，艾寧夏蘭特過去一個多月開心放暑假，睇佢IG又去游水又去餵牛，夠晒逍遙自在，至於佢來季去向，盛傳車路士班主阿布拉莫域豪擲1.5億鎊轉會費簽佢，至今仍在運作中，天價收購談判過程漫長，係急唔嚟。

至於夏蘭特早前「失蹤」，當時球會高層講笑咁話佢去咗英國傾轉會，但過咗兩日，呢位下周滿21歲前鋒已經現身，仲寫明係「第一日」，或者佢係一邊跟住多蒙特操先，一邊等消息。

夏蘭特同多蒙特有協議，如果明年離隊，可啟動6500萬鎊違約金，不過想簽夏蘭特嘅球會非常多，依家都叫到1.5億鎊，多蒙特冇可能留位佢。