朗奴高文開火！轟西班牙足總用殘柏迪

最強博彩盤路過關神器《串績王》：http://win.on.cc/football/　

西班牙喺今屆歐國盃未能奪冠，不過18歲中場柏迪嘅表現就光芒四射，上季先至喺西甲成為巴塞隆拿主力嘅佢，踢完歐國盃決賽周之後，立即又要為西班牙U23飛去東京出戰奧運，賽事完結後西甲已經準備開咧，巴塞隆拿教練朗奴高文日前就炮轟西班牙足總嘅決定。

朗奴高文表示：「柏迪已經踢咗好多比賽，佢需要一個休息，所有歐洲球員喺夏天都有得休息。正如哥迪奧拿話齋，一個夏天踢兩項大型賽事，絕對係太過火，但我哋根本無能為力。柏迪只係得18歲，喺歐國盃已經差唔多踢足每分鐘賽事，佢實在係表現得非常成熟。」

柏迪上季喺西甲踢咗37場，連埋盃賽在內合共上陣52場，3月先至入選國家隊嘅佢，到依家已經10次為西班牙上陣，日前西班牙奧足熱身賽1比1逼和日本奧足，柏迪同樣有份落場，如果西班牙U23一路殺到入奧運男足決賽，柏迪真係鐵人都踢到殘呀！