安定猛牛為屯門屋邨仔爭口氣!

2021年07月19日 19:05
東網電視
更多新聞短片
【邨JUMP!.人物】「有時佢可能唔聽指令,但又入到波令球隊贏波,咁我都吹佢唔脹,佢算係細細個就出咗名,所以有啲偶像包袱,如果之後要繼續打上去,就要放低身段同多啲聽人意見。」安定猛牛教練李旭川所指令自己又愛又恨的球員正是隊長鄭偉鏗。
年僅19歲的鄭偉鏗目前就讀嗇色園主辦可藝中學,擔任得分後衞並擅長外圍及3分投射,此子更曾於金盃賽4強首回合狂轟31分,屬安定猛牛得分主力。然而這名明星球員卻透露因長期自我要求過高,繼而患上躁狂症:「第1年打波已經係咁,當打得唔好個陣就會有,但我通常喺場會盡量抑壓住自己,打完比賽先至發脾氣,好似打牆等,唔想畀隊友睇到,驚影響佢哋情緒。」
「屯門牛呀嘛!球隊嘅優勢係唔要命同好搏,另外我哋都比較團結,本身大家已經認識,所以好有默契。」「阿鏗」打趣地說出球隊優點,他笑言分組賽面對逸東一仗便是最佳例子:「最多試過落後20分,不過隊友唔要命咁搏命守波,最後1分鐘連追13分打和,雖然隊友(梁靖熙)唔好彩犯規送咗個罰球畀人,去到黃金入球輸波,但依場比賽真係好難忘。」
即將踏上《邨JUMP!》決賽舞台,「阿鏗」表示以平常心對待,不會特別緊張,惟代表屯門出戰的他心目中原來有一個更宏遠的目標:「屯門一直都係唔俾人睇好嘅地方,俾人睇低一班,基本上名校都係出自於九龍區、港島區,屯門區就算打得勁嗰一兩間都唔會成日俾人提起,到而家打贏左其他屋村,希望證明屯門可以同出面嘅人爭。」
文:李浚湣
—————————
《邨JUMP!》冠軍爭霸戰
日期:7月24日 地點:修頓場館
11:30 總決賽-共融賽
12:15 總決賽-銀盃賽冠軍戰 迎東破浪 vs 沙角環擊
*14:30 總決賽-金盃賽冠軍戰 安定猛牛 vs 瀝源飛俠
*16:00 總決賽-全明星邀請賽
*東網免費直播