厠所樓底太矮！各國運動員小便頂天立地

東京奧運選手村又出事！今次係個厠所。奧組委掛住防疫，好多細節難免有甩漏，其中選手村房間內嘅厠所，樓底實在有啲矮，搞到各國運動員頭頂天花板，要側住個頭小便！

好多籃球及排球運動員身高都超過2米，咁就出事喇，有俄羅斯排球隊成員上載相片，佢喺厠所內頭頂天花板，要45度角側頭先入到去，難得佢仲竪起兩雙手指公影相。另一隊友比較幸運，因為佢身高只有1.98米，頭部剛好貼住天花板，唔使側頭。

選手村單位在奧運會結束後將會出售畀日本居民，日本人甚少高過2米，佢哋起個厠所2米樓底，日本人用就啱啱好，至於各國嘅籃球及排球運動員，呢段時間就要將就吓喇！