【有片】利物浦連和 干拿迪首演有料到

2021年07月21日 08:00
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
英超勁旅利物浦周三(21日)凌晨喺奧地利展開季前熱身賽,「紅軍」喺接連2場各30分鐘嘅賽事入面,分別同恩斯布魯克、史特加踢成1比1平手,焦點人物係今夏以3,600萬鎊轉會費加盟嘅中堅伊巴希馬干拿迪,呢位法國小將首演大獲好評,仲展示出令球迷詫異嘅高速度。
利物浦首場對恩斯布魯克,由阿歷山大阿諾特同祖爾麥迪比帶住一班後備同新人落場,卡利奧斯、南野拓實、奧歷治等預計會被放走嘅球員都在陣,結果利物浦憑奧歷治射入12碼先開紀錄,但最終都被恩斯布魯克追和1比1。
第2場對住德甲史特加,利物浦就盡遣穆罕默德沙拿、沙迪奧文尼同阿歷士張伯倫等主力,法國中堅伊巴希馬干拿迪亦首度披甲,呢位22歲新星雖然身高1米94兼身型龐大,但原來速度唔差,先後2次喺對手半單刀情況下,高速回追瓦解對手射門。利物浦呢場雖然先失守,但憑沙迪奧文尼門前撞入追和,2場比賽都踢成1比1平手。
利物浦領隊高普賽後表示:「干拿迪踢得好好,就同我預期嘅一樣,佢喺練習嗰陣已經係咁樣。」不過,高普透露2名重傷初愈嘅中堅華基爾雲迪積克同祖高美斯「未踢得」,下場熱身賽對緬恩斯多數唔會上陣,意味干拿迪同祖爾麥迪比好可能係利物浦季初嘅中堅組合。