普巴同PSG展開斟介　曼聯或半價平賣

最強博彩盤路過關神器《串績王》：http://win.on.cc/football/　

據英國《每日郵報》消息，曼聯中場保羅普巴嘅經理人拉奧拿，已經同法國班霸巴黎聖日耳門(PSG)就轉會展開斟介，由於保羅普巴同曼聯只係得番1年合約，消息指「紅魔鬼」今夏必定要將佢出售套現，焗住要以超過「5折」嘅4,300萬鎊賣人。

28歲嘅保羅普巴喺曼聯周薪達29萬鎊，雙方目前未就續約有任何行動，意味呢位法國國腳明年可以自由轉會。曼聯為免第2度「免費」失去保羅普巴，今個夏天賣人機會極高，報道指雖然PSG同曼聯仍未正式接洽，但已經同拉奧拿作出會面，相信好快會有進一步行動。

曼聯喺2012年被逼放走自由身嘅保羅普巴，當時祖雲達斯只需要向曼聯支付80萬鎊「培育費」，結果曼聯2016年以8,900萬鎊再次收購保羅普巴；「紅魔鬼」為免下年人財兩失，今夏願意以4,300萬鎊賣人，連收購價嘅一半都收唔番。