俄羅斯游泳新星確診 奧運前夕再爆退賽潮 

2021年07月22日 13:30
東網電視
更多新聞短片
奧運開幕前再有選手退出奧運!俄羅斯奧委會周四(22日)宣布年輕男泳手布洛丁(Ilya Borodin)證實確診新冠肺炎,需要退出今屆東京奧運,連同之前荷蘭女滑板手積及布斯(Candy Jacobs)、智利跆拳道女選手阿吉雷(Fernanda Aguirre)等,暫時已經有多達5名運動員退賽,相當可惜。
年僅18歲俄羅斯男泳手布洛丁(Ilya Borodin)出發前夕,喺訓練營證實確診新冠肺炎,需要退出今屆奧運。依名新星喺今年歐洲游泳錦標賽一鳴驚人,取得400米男子混合泳冠軍,被視為俄羅斯游泳嘅獎牌希望,原本會參加200米同400米混合泳。佢早前接受記者電話訪問就指自己並無大礙:「我感覺好好,並無任何症狀同疼痛感,狀態都不錯。但我完全諗唔起自己係喺邊到感染,除咗酒店同泳池,基本上咩地方都無去。」
至於另一男泳手來自立陶宛嘅泰迪尼斯(Giedrius Titenis)就相對好彩,依名31歲老將抵步後第1次檢測原本證實確診新冠肺炎,但之後嘅檢測結果竟然全部陰性,意味著第1次係「假陽性」並可以繼續比賽。泰迪尼斯即將第4次參加奧運,2012年係100米蛙泳中獲得第8名,成為歷來第2位殺入奧運決賽嘅立陶宛游泳運動員。