阿拉巴大膽着皇馬4號　原因竟然係咁

最強博彩盤路過關神器《串績王》：http://win.on.cc/football/　

西甲豪門皇馬正式為新兵阿拉巴舉行加盟儀式，最矚目地方係呢位29歲奧地利國腳揀咗前隊長沙治奧拉莫斯留下嘅4號球衣，當傳媒問阿拉巴點解咁有「勇氣」接過呢件傳奇波衫時，佢竟然話已經冇其他號碼揀。

沙治奧拉莫斯上月約滿離隊，結束效力皇馬16年生涯，轉投巴黎聖日耳門，呢位中堅屬於皇馬殿堂級球員，4號球衣更係佢嘅標誌，西班牙傳媒早前指，冇皇馬球員敢着呢件波衫，新加盟嘅阿拉巴可能冇呢個心理包袱，願意成為新4號仔。

阿拉巴話：「拉莫斯效力皇馬十幾年，眾所周知佢係1位領袖，但會方話我知，得番4號球衣懸空，我唔想同隊友傾交換號碼嘅問題，所以惟有着4號，我想為呢個號碼帶來新榮譽。」

阿拉巴亦暗示唔想同沙治奧拉莫斯作比較，只會盡力為球隊作出貢獻，踢出自己風格，同埋佢可以勝任多個位置，會等候教練安察洛堤安排。