史上最激德乙!做定功課等開咧

2021年07月22日 15:06
東網電視
更多新聞短片
歐國盃隨住意大利封王正式落幕,不過球迷唔使失落,各地聯賽球隊已經陸續開操備戰新球季,當中德乙更加會喺7月23號(周五)深夜搶先開鑼,上季由德甲降班嘅史浩克04、雲達不來梅,會唔會同另一支老牌球隊漢堡呈現三強鼎立局面?新季東網將會繼續直播德乙賽事,大家記得留意喇!
不來梅執靚防線
雲達不來梅今季有中場柏德列艾拉斯轉投基爾,為咗改善後防不穩問題,佢哋季前簽入柏林聯後衞尼高拉拉普,又從拜仁慕尼黑借嚟德國守將拿斯邁爾,後者啱啱幫「日耳曼兵團」捧走U21歐國盃,潛質優厚,配合中場悍將比頓確特,以及喺熱身賽表現搶眼嘅艾格史甸,整體實力可以話有增無減。
史浩克04大換血
上季遭逢30年來首度降班嘅史浩克04,今夏人腳變動相對較大,前線有賓尼圖拉文、馬克烏夫、蘇奧沙達離隊,後場更有大將哥拉辛拿斯外借完畢回歸阿仙奴,為咗彌補缺口,佢哋分別從利物浦、賀芬咸收回奧辛卡巴克同施巴斯坦魯迪,能唔能夠喺新季有一番作為?就要睇上季幫漢堡轟入24球嘅新箭泰路迪,能唔能夠Keep住有表現喇!
漢堡唔做梗頸四
漢堡自從2018年降落乙組後,雖然一直力爭上游,不過近3季都只做梗頸四,每次都喺最後階段同升班資格擦身而過,認真慘情。呢支北部球會今夏除咗搵嚟前史特加主帥添禾達執教外,喺轉會市場未有太大動作,預料新季會續以桑尼傑圖、堅森比等原有班底孭飛,即管睇吓添禾達可唔可以帶領漢堡取得突破啦!
其他球隊方面,兩支中上游份子達斯泰特、柏達邦都值得留意。達斯泰特上季排第7,全季共入63球失55球,攻力是全德乙第4強,但失球數字卻是前10位球隊中最多,難怪上季34場有26次開3球或以上,成為德乙大盤王。至於柏達邦剛好相反,球隊防線硬淨,尤其作客,防守力更為全德乙第2強。柏達邦上季17場作客,有11次開2球或以下,成為德乙作客細盤王,投注時可多加注意。