李察利臣奧運發威　阿根廷3星冇品奚落

巴西同阿根廷都係奧運男足金牌熱門，不過兩隊喺周四(22日)首仗就命運各異，阿根廷男奧足喺C組意外吞澳洲男奧足2蛋，而巴西男奧足就喺D組4比2大破德國男奧足，效力愛華頓嘅巴西前鋒李察利臣更上演帽子戲法，成為英超史上第1個喺奧運連中三元球員。

李察利臣賽後興奮表示：「今場係我第一個帽子戲法，簡直係夢想成真，尤其係着住巴西國家隊嘅10號波衫，為咗對得起呢件波衫，我要求愛華頓畀我踢奧運，今晚實在係非常難忘。」李察利臣成為巴西英雄，勢估唔到就畀3位阿根廷球星狂寸。

阿根廷媒體TyC Sports報道李察利臣喺奧運入3球後，啱啱協助阿根廷捧美洲盃冠軍嘅里安度柏利迪斯就留言：「咁美洲盃決賽呢？」並且加上兩個恥笑對方嘅emoji，之後盧施素同迪馬利亞同亦加入，齊齊留低「笑到喊」等emoji奚落李察利臣。據里安度柏利迪斯嘅IG相片，原來佢哋3個依家結伴度假，更一齊睇阿根廷男奧足嘅直播，唔知係咪唔抵得巴西男奧足贏波，所以搵李察利臣出氣呢？