C朗復操獲英雄式歡迎 話事人親證留隊

2021年07月27日 13:00
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
盛傳會喺今夏轉會嘅葡萄牙球星C朗拿度,周一(26日)正式重返祖雲達斯進行季前集訓,立即得到大批球迷英雄式歡迎。祖雲達斯副會長尼維特亦宣布,C朗拿度新一季將會繼續留隊,粉碎轉會傳聞,教練阿里基亦會以C朗拿度同保羅戴巴拿為核心重建球隊。
C朗拿度為葡萄牙踢完歐國盃後,周一終於返都靈參加訓練,同馬菲斯迪歷特、拉比奧特等歐國盃球員齊齊回歸,當然C朗係最受歡迎球員,大批球迷拎住佢嘅波衫恭候,C朗亦大方同球迷簽名兼合照,親民作風難怪贏得一眾粉絲歡心。
雖然有傳聞話巴黎聖日耳門等豪門對佢虎視眈眈,同祖雲達斯只剩1年約嘅C朗亦未有續約跡象,不過祖雲達斯副會長尼維特日前就公開表示:「C朗星期一歸隊,佢會繼續留喺祖雲達斯。」C朗目前年薪高達3,000萬歐元,成為續約最大阻滯,不過《都靈體育報》就指另一前鋒保羅戴巴拿,就有望加薪續約。
同樣只剩1年約嘅保羅戴巴拿,經理人今個星期就會飛嚟都靈斟介,消息指祖雲達斯開出新約,年薪會由750萬歐元增加至1,000萬歐元,教練阿里基亦會改用4-2-3-1陣式,畀C朗拿度同保羅戴巴拿「共存」,C朗拿度將會出任箭頭位置。