未開季就受傷　拉莫斯缺陣PSG兩場比賽

最強博彩盤路過關神器《串績王》：http://win.on.cc/football/　

早前以自由身從皇馬轉投巴黎聖日耳門(PSG)嘅西班牙中堅沙治奧拉莫斯，喺操練時整傷小腿肌肉，起碼需要休息一星期，除咗缺陣周三(28日)凌晨對西維爾之外，亦無緣法冠盃對里爾。

35歲嘅沙治奧拉莫斯上季已經備受傷患困擾，近日操練時又受傷，結果冇得喺熱身賽倒戈對母會西維爾，呢場比賽PSG靠莫路伊卡迪及19歲小將拿格拉各入1球，以2比2逼和西維爾。

沙治奧拉莫斯踢唔到熱身賽，又少咗1次同隊友磨合嘅機會，呢位老將亦無緣香港時間8月8日凌晨法冠盃對上季聯賽冠軍里爾，PSG好希望贏呢場法甲開鑼前哨戰，為新一季壯聲威，拉莫斯到時只能喺場邊為隊友打氣。