張雨霏奪中國游泳第一金!兼破200蝶奧運紀錄   

20210729
東網電視
更多新聞短片
(Getty images)
周四(29日)東京奧運女子200米蝶泳決賽,中國女泳手張雨霏由頭帶到尾,終以破奧運紀錄嘅2分03秒86奪金,兼取得中國今屆奧運第一面游泳金牌!中國失落咗上屆里約奧運女子200蝶金牌,無緣3連霸,今屆即刻反彈,而劉子歌同焦劉洋分別係12年同16年奧運金牌得主。
張雨霏今場贏得相當輕鬆,好快拉開咗同其他選手距離,首個50米已經領先1.2秒,去到100米優勢更擴大至1.57秒。雖然第3次「轉池」張雨霏領先優勢縮減至1.34秒,但佢拼盡全力最終以2分03秒86成績游過終點,取得中國今屆第一面游泳獎牌兼打破奧運紀錄,至於2位美國泳手史密芙、費基妮亞分別奪銀牌同銅牌。
張雨霏年僅23歲,出生自體育世家,父母都係游泳教練,3歲雨霏已經跟媽媽「下水」,但爸爸就因成日帶隊比賽,所以相處時間唔多,每一次當爸爸返屋企,雨霏就黏喺佢身邊寸步不離。但4歲時爸爸突然離世,令雨霏遭受咗沉重打擊,依個時候雨霏只能夠將思念寄放喺泳池。
張雨霏5歲被送到徐州市游泳隊接受正規訓練,天賦甚高,2010年於江蘇省第十七屆運動會上一鳴驚人,取得2金3銀1銅戰績,加上2012年11月首次出征世界大賽便斬獲一銀一銅,終於2013年11月入選國家隊。
然而張雨霏2015年卻被發現身上有小問題,當時中國隊教練表示:「人嘅正常側身係S型,而她係直,做波浪動作會特別困難,尤其對於蝶泳選手。」幸好教練同科技人員幫佢喺體能訓練中製定出一個訓練計劃,令張雨霏矯正部分身體功能並修復拉傷。
2016年里約奧運18歲嘅張雨霏首征奧運卻無緣獎牌,佢最終淚灑賽場,今屆東奧終於喺200蝶拎到金牌,能夠彌補遺憾佢賽後亦相當開心:「爸爸佢可能都無諗過我會走上專業依條路,更加無諗過我可以站上奧運會頒獎台。」
回想起自己嘅游泳生涯,張雨霏笑言自己曾經特別討厭游泳:「因為爸媽都係游水教練,當時就會諗你哋叫我游水,還畀我游蝶泳,仲要係200米蝶泳!想攰死我咩?」