阿仙奴不敵車路士 柏迪打柴勢缺席英超開季

2021年08月02日 09:00
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
周日(1日)晚英超重量級熱身賽,阿仙奴喺主場1比2輸畀車路士,「兵工廠」今場相當黑仔,有入波明顯過晒白界被當唔入之外,中場湯馬士柏迪更嚴重拗傷,好可能會缺席英超開季賽事,領隊阿迪達賽都話:「(傷勢)睇落唔太樂觀。」
阿仙奴今場採取主動,但車路士嘅反擊更具威脅,27分鐘一次突擊就由夏維斯勁射先開紀錄,阿仙奴之後有伊美路維射門中柱未能追平,39分鐘更有中場湯馬士柏迪畀車路士守將瞓身壓傷右腳足踝,被逼提早退下火線。
下半場阿仙奴繼續主攻,69分鐘由格列沙加接應角球頭槌頂成1比1,但3分鐘後又有比利連自殺式橫傳,被車路士前鋒譚美阿巴謙截到輕鬆射入。阿仙奴尾段有祖爾韋洛克狂抽中楣底彈入,雖然慢鏡見到個波已經入晒白界,但由於呢場熱身賽並冇鷹眼,球證亦「發雞盲」,結果誤判冇入球,阿仙奴慘輸1比2。
熱身賽輸波無傷大雅,但阿仙奴中場湯馬士柏迪右腳足踝拗傷,阿迪達賽後表示:「佢聽日(周一)會做詳細檢查,但依家睇落唔太樂觀,而且唔能夠繼續比賽,對湯馬士柏迪嚟講係比較少見。」據報呢位加納中場有可能要抖4至6個星期,大大影響阿仙奴季初比賽力量。