有壓力！馬列斯騷Quali唔輸基亞利殊

最強博彩盤路過關神器《串績王》：http://win.on.cc/football/　

近日盛傳將以1億鎊簽入基亞利殊嘅曼城，周日(1日)季前熱身賽主場以4比0大破班士利，馬列斯唔知係咪感受到基亞利殊加盟嘅壓力，呢位阿爾及利亞翼鋒繼續火熱狀態，今場交出1個入波同2次助攻，話畀領隊哥迪奧拿知佢一樣可以擔大旗。

據英國《曼徹斯特晚報》報道，基亞利殊如果順利加盟，馬列斯同史達寧其中一個會讓出正選位置，而相比起史達寧、菲爾科頓同費倫托利斯可以勝任多個位置，專攻右翼嘅馬列斯最大機會成為「犧牲者」，可能會被曼城賣走套現。

雖然受到離隊壓力，馬列斯季前熱身表現搶鏡，上半場先助攻2位青年軍小將入波，34分鐘再窩利抽入領先3比0，曼城下半場再由尼敦阿基「埋齋」，大勝4比0完場。曼城上場熱身賽贏普雷斯頓2比0，馬列斯同樣轟入一記精彩罰球，向哥迪奧拿騷Quali。