喜訊！英超VAR改革　「腳趾甲越位」將絕迹

足球博彩神器，每日重心提供盡在《彩報》：http://win.on.cc/football/　

英超嘅VAR被公認係球壇最差之一，上季製造嘅爭議判決睇到球迷眼火爆，不過新一季英超開鑼前就有好消息傳出，英超球證主席萊利透露，VAR喺新賽季會作出調整，其中喺越位問題上面，將會加入粗線嚟判定越位，將「疑點利益歸於攻方」，「腳趾甲越位」嘅爭議可望絕迹。

萊利日前表示：「我哋之前同球會、球員、領隊、球迷團體傾過點樣改善執法問題，當中有部份係同VAR相關，好似越位問題，大前提係要畀球員盡可能表現自己，保持比賽流暢度。」關於越位執法，VAR上季用1像素嘅線條嚟量度越位，但新季就會加入由轉播商提供嘅粗線，可以覆蓋真實場景10cm範圍，意味就算進攻球員輕微突前(10cm之內)，都唔會被視為越位。

萊利透露如果新例喺上季就應用，就會有20個被判越位嘅入波變成有效，相信會令入球率大大增加。另外，新例亦會對禁區內嘅身體接觸更加寬容，唔會因為攻擊球員喺有任何身體接觸下跌低就判12碼。