「文武雙全助學計劃」落區體驗關顧他人

2021年08月06日 22:00
東網電視
更多新聞短片
李俊亨(左二)在活動展開前,提醒一眾義工需注意的事項。 (文武雙全青少年發展機構提供)
炎炎夏日,除咗全情投入奧運替香港運動員打氣,同完成學校老師分派嘅暑期功課外,有啲同學會去學、去玩唔同嘅嘢挑戰吓自己,自我增值,亦有唔少同學會去參與義工服務,親身體驗咩叫做施比受更有福。
由香港散打同綜合搏擊代表李俊亨(Henry)牽頭嘅「文武雙全助學計劃」,於今年3月展開,參與嘅學員可以免費接受綜合搏擊訓練,同埋網上英文科補習;而喺4月文武雙全青少年發展機構亦正式成立,除咗繼續推行「文武雙全助學計劃」之外,更大力推動其他適合青少年參與嘅活動,包括書法、急救、游泳、跳繩、野外定向、配音班、寵物護理,同埋惠及唔同對象嘅義工服務。
喺上個月嘅26日(星期一),15位「文武雙全助學計劃」嘅學員,就同文武雙全青少年發展機構嘅導師同職員組成義工隊,同機構「愛心飯團」合作,喺深水埗基隆街向長者同有需要人士,派發咗600個飯盒,另外仲有飲品同小食。「活動效果非常之唔錯,相信參與嘅每一位學員,都可以感受到施比受更有福,學識點樣多啲關顧身邊嘅人。」活動當日事事親力親為嘅Henry表示,未來會繼續舉辦唔同嘅義工服務,希望參與同受惠嘅人可以愈嚟愈多。
12歲嘅朱殷誼係當日嘅其中一位義工,喺短短3個鐘嘅活動之後,有好深嘅感受,佢咁講:「我之前未試過派飯,覺得好有意義,可以幫到有需要嘅人,係一件好事嚟,所以嚟緊有機會都會繼續做。」暑假之後將會升讀中一嘅「殷誼」仲提到,「文武雙全助學計劃」嘅網上英文科補習幫到佢好多,冇之前咁擔心。