續約利物浦至2025年　雲迪積克：我好自豪

英超勁旅利物浦今夏除咗簽入唔少新球員之外，亦積極同陣中球星續約，繼法賓奴泰華利斯、艾利臣比加、阿歷山大阿諾特之後，周五（13日）球隊於官網宣布已同中堅華基爾雲迪積克(VVD)續下2年新約，依名荷蘭球員將會留隊直至2025年夏天。

「由加盟利物浦第一日開始，我就受到球迷、隊友同工作人員讚賞，令我覺得自己可以成為球隊重要一員，今次續約令我感到非常驕傲同自豪，有信心可以帶領球隊未來繼續前進。」VVD同球隊合約原本只係去到2023年，如今再續新約之後將會留隊至2025年夏天。

30歲嘅華基爾雲迪積克自2018年由修咸頓加盟利物浦後，已為球隊披甲130次並射入13球，成為球隊後防定海神針，但佢上季季初對愛華頓被對手門將比克福特剷傷，導致右膝前十字韌帶撕裂，最終提早收咧，成季只係踢得5場聯賽，間接令利物浦無法衞冕英超冠軍。

VVD喺7月尾對哈化柏林嘅季前熱身賽經已傷愈復出，英超首周對諾域治更有望正選上陣，今次再續新約相信唔止佢，一班「紅軍」球迷都相當興奮。