米蘭雙雄同病相憐　面臨一齊被賣盤

最強博彩盤路過關神器《串績王》：http://win.on.cc/football/　

「米蘭雙雄」國際米蘭、AC米蘭上季分別成為意甲冠亞軍，自2010/11年後再次包辦前2位，令人期待米蘭王朝再現。不過，「高位」卻成為出貨時候，意大利著名財經媒體《Il Sole 24 Ore》爆料指「米蘭雙雄」嘅班主都計劃出售球會。

國際米蘭大股東係蘇寧集團，呢間中國企業近年陷入財困，旗下中超球會江蘇蘇寧即使奪得聯賽冠軍，一樣被迫散班，國米似乎正在步其後塵，先係要球員減人工，會方今夏更將2位球星盧卡古、阿舒拉夫出售，籌到1.8億歐元，但仍然未夠，有傳蘇寧集團希望出售國米，退出球壇。

至於AC米蘭班主係投資基金Elliott Management Corporation，3年前入主A米，目的只為提升球會價值，然後出售獲利。A米相隔8年，終於再取得歐聯入場券，令球會價值大增，正係班主賣盤套現好時機，呢2支老牌球隊新一季將面臨更大不明朗因素。