哈利卡尼操練現身　出征歐協聯又冇份

最強博彩盤路過關神器《串績王》：http://win.on.cc/football/　

曼城收朋熱刺前鋒哈利卡尼一事繼續拉鋸，主角哈利卡尼經過多番擾攘之後，周三(18日)終於喺球會訓練場公開現身，不過目前仍然只係進行單獨練習，原本預計佢會參加周五(20日)凌晨歐協聯作客費利拿一仗，但球會出發去葡萄牙嘅大軍，哈利卡尼仍然冇份，今夏去留充滿變數。

熱刺周三下午進行操練，哈利卡尼就喺twitter貼出自己單獨練習嘅相片，留言話「又完成一課練習」，亦係呢位英格蘭前鋒被爆「罷操」後，首次被見到喺熱刺訓練場出現。不過，熱刺大軍隨後出發葡萄牙作客費利拿，哈利卡尼並冇份出征，意味佢最快要到周日(22日)作客狼隊先可以上陣。

熱刺領隊紐奴表示曾同哈利卡尼食早餐「傾偈」：「我哋傾嘅事唔會公開，事實係哈利卡尼係熱刺球員，佢正努力提升狀態，而且一日比一日好。」據報哈利卡尼仍然希望熱刺可以同曼城傾掂數，但曼城最近一次1.25億鎊開價被拒，就令哈利卡尼好不滿，認為望席利維違反君子協議，令佢轉會曼城嘅夢想面臨破滅。