里奧費迪南炮轟菲爾鍾斯「賴死唔走」

最強博彩盤路過關神器《串績王》：http://win.on.cc/football/　

曼聯今夏簽入法國國腳華拉尼後，中堅位置已由佢同哈利馬古尼、域陀連迪路夫、艾歷拜利等佔據，不過效力球會10年嘅菲爾鍾斯仍然在陣，呢位過去18個月一直養傷嘅中堅，日前喺閉門熱身賽入面復出，不過名將里奧費迪南就忍唔住炮轟，指菲爾鍾斯喺曼聯「賴死唔走」，阻礙其他新人上位。

菲爾鍾斯2011年加盟曼聯嗰陣，里奧費迪南都仲係曼聯球員，依家只得29歲嘅菲爾鍾斯一直上唔到位，但又冇諗過要轉會博翻生，搞到里奧費迪南好嬲：「我覺得幾年前已經要走，甚至要早過基斯史摩寧離開，佢依家係霸住一個本應由青年軍出任嘅位置。如果菲爾鍾斯已經冇傷，但又唔轉會唔外借而選擇坐喺度，呢個唔係足球員要嘅嘢。」

雖然菲爾鍾斯近年經常受傷，但曼聯喺2019年離奇同佢續約4年，依家佢仲有2年先至約滿，而且周薪達到13萬鎊，球會亦都冇辦法，難怪里奧費迪南咁嬲。