合理！哈利卡尼要求英超最高薪

熱刺拒絕放走哈利卡尼，令佢今夏轉會曼城未能成事。英國《泰晤士報》報道，卡尼留隊後同熱刺講數，佢提出英超最高嘅40萬鎊周薪，再附加離隊條款。

哈利卡尼留喺熱刺，外間反應普遍都認為係球員「屈就」，欠爭標魄力嘅熱刺根本冇資格留住呢位神鋒，報道指哈利卡尼去年夏天已經獅子開大口，將佢周薪提高至30萬鎊，但如今離隊觸礁，卡尼自然要再同熱刺計數。

目前英超最高薪球員，係曼城嘅奇雲迪布尼，據報周薪超過38萬鎊，第2位係迪基亞嘅37.5萬鎊，依家哈利卡尼提出，周薪要高過晒佢哋，索要周薪40萬鎊，並附設離隊條款。

報道指，熱刺亦非省油的燈，會方向哈利卡尼開出入球獎金嘅條款，唔會白畀人工。