英超官網7號雙胞胎　卡雲尼粉碎C朗美夢

最強博彩盤路過關神器《串績王》：http://win.on.cc/football/　

C朗拿度重返曼聯令球壇震驚，今次轉會其中一大話題，就係C朗可唔可以保得住「CR7」呢個招牌，事關C朗嘅招牌7號波衫依家由卡雲尼擁有，球衣號碼亦受到英超條例約束。英超官網日前更新曼聯球員名單，竟然出現兩個7號嘅畫面，令球迷相信C朗仍然有機會重奪7號波衫，不過隨住周一(30日)凌晨對狼隊後，呢個美夢相信已正式幻滅。

根據英超賽會條例，當球季展開之後，仍然留隊嘅球員就要用番註冊嘅號碼，不過《曼徹斯特晚報》爆料，話條例仲有灰色地帶，因為卡雲尼頭2輪聯賽都冇上過陣，曼聯有機會申請轉號碼，而英超官網嘅球員名單，亦離奇將C朗拿度同卡雲尼同時列為7號，令球迷相信轉號碼仲有價講。

不過，曼聯作客狼隊一仗，因為出戰美洲國家盃而遲歸隊嘅卡雲尼，喺53分鐘後備入替丹尼爾占士，今季正式着起7號波衫登場，意味《曼徹斯特晚報》所指嘅灰色地帶亦都唔存在，C朗今季將要轉用其他號碼。