占士將投列斯聯　卡雲尼着21號　C朗着7號？

最強博彩盤路過關神器《串績王》：http://win.on.cc/football/　

C朗回巢曼聯後，令紅魔鬼鋒線出現人滿之患，英國各大傳媒指曼聯將出售快翼丹尼爾占士畀列斯聯。當呢位威爾斯國腳離隊之後，射手卡雲尼好可能改着21號球衣，並將7號波衫轉讓畀C朗。

據悉，列斯聯願意以破球會轉會費紀錄嘅3,000萬鎊收購丹尼爾占士，成功打動曼聯放人，畢竟紅魔鬼2年前只係用1,500萬鎊買入丹尼爾占士，依家出售呢位後備球員，可以賺1倍，對球會而言係非常好嘅交易。

丹尼爾占士離開曼聯之後，可以順便解決埋卡雲尼同C朗嘅球衣問題，據悉英超賽會肯順應民意，破例批准曼聯喺開季之後更換球衣號碼，卡雲尼願意將7號讓畀C朗，佢可能改着踢烏拉圭國家隊時嘅21號球衣，呢件波衫原本屬於丹尼爾占士，佢離隊之後，卡雲尼可望成為21號新主人。