魯賓戴亞斯同曼城續約6年　期待鬥C朗

足球博彩神器，每日重心提供盡在《彩報》：http://win.on.cc/football/　

曼城正式宣布，同中堅魯賓戴亞斯續約6年，去到2027年，用「賣身契」綁實呢位葡萄牙國腳。魯賓戴亞斯非常興奮可以長期留效「藍月亮」，並期待喺曼徹斯特打吡，同回巢曼聯嘅國家隊隊友C朗交鋒。

現年24歲嘅魯賓戴亞斯上年9月以6,200萬鎊轉會費由賓菲加轉投曼城，立即成為球隊必然正選，至今為「藍月亮」各項賽事上陣54次，仲有1球進帳，成為曼城奪得上季英超冠軍及打入歐聯決賽嘅功臣，佢亦當選上季英格蘭足球先生及英超最佳球員。

據悉，魯賓戴亞斯現時周薪只有9萬鎊，曼城自知「虧待」呢位猛將，所以補飛同佢續約，並加佢1倍人工，達到18萬鎊周薪。

魯賓戴亞斯續約之後，心情非常興奮，揚言要為曼城奪得更多冠軍，並期待同C朗喺英超交鋒，有信心凍結呢位超級射手。魯賓戴亞斯現時同C朗一齊為葡萄牙備戰世界盃外圍賽，將會對愛爾蘭同阿塞拜疆。