擊敗雙紅！車路士神簽西班牙全能戰士

最強博彩盤路過關神器《串績王》：http://win.on.cc/football/　

英超勁旅車路士再添猛將，正式宣布喺英超夏季轉會市場關閉前最後一刻，以先借後買方式簽入馬德里體育會中場大將沙奧尼古斯。英超「雙紅」曼聯同利物浦一直爭奪呢位26歲西班牙全能戰士，但佢最終選擇上「車」。

車路士今次簽入沙奧尼古斯，價錢非常抵玩，今季借用費僅500萬歐元，明夏有權選擇以4,000萬歐元買斷佢。出身於馬體會青年軍嘅沙奧尼古斯為呢支西甲勁旅上陣340場入43球，捧過1次西甲、1次西班牙盃、1次西超盃、1次歐超盃、2次歐霸盃冠軍，並為西班牙國家隊上陣19次入3球。

沙奧尼古斯技術非常全面，可以勝任中場所有位置，甚至可以客串左後衞，佢加盟車路士之後，無疑可以大大提升球隊中場攻守能力。

車仔今夏先後簽入2位重量級球星盧卡古、沙奧尼古斯，令陣容更加完整，爭標機會大增。