麻醉失誤昏迷39年　前法國國腳阿當斯去世

足球博彩神器，每日重心提供盡在《彩報》：http://win.on.cc/football/　

70年代曾代表法國上陣22次嘅中堅阿當斯，喺1982年一次普通膝部手術當中，因為麻醉過程出現失誤而一睡不起，昏迷39年之後，周一(6日)喺法國一間醫院宣告去世，享年73歲。

曾效力尼斯、巴黎聖日耳門等球會嘅阿當斯，喺1982年3月17日為膝部進行一次普通手術，原本只係麻醉幾個鐘頭，但因為過程出錯，呢位球星一直都醒唔番。據報當時阿當斯嘅主診醫生，同一時間要處理8個病人，就呢宗醫療事故，里昂法院曾經經過7年審訊後，判負責嘅醫生「過失傷人」罪名成立。

阿當斯妻子Bernadette一直未有放棄，多年來喺多間球會、法國足總同各方捐款下，39年來都照顧阿當斯起居飲食，Bernadette喺2007一次訪問入面話：「阿當斯有知覺，可以聞到氣味同聽到嘢，有時聽到狗吠佢都會有反應。」Bernadette喺去年亦曾表示：「我冇勇氣去停止照顧佢。」可惜奇迹最終未有出現，周一喺尼姆大學醫院過身。