【有片】C朗費南迪斯罰球大戰　邊個贏？

最強博彩盤路過關神器《串績王》：http://win.on.cc/football/　

C朗拿度「王者回歸」曼聯之後，原本嘅男主角般奴費南迪斯難免要退居做配角，12碼劊子手嘅責任亦幾乎肯定會由C朗孭起，不過講到主射罰球，般奴費南迪斯就唔想讓出，上場對紐卡素前嘅熱身，有球迷就影到2大球星進行罰球大戰，結果般奴費南迪斯仍然技高一籌。

呢段網上瘋傳影片所見，般奴費南迪斯同C朗喺對紐卡素前熱身，齊齊喺禁區頂練罰球，般奴費南迪斯率先主射，個波直接彎入遠柱死角，博到現場球迷一片歡呼，之後輪到C朗操刀，但佢選擇射近柱因為攞得太盡，結果撞內柱彈出。

般奴費南迪斯日前接受《BBC》訪問，亦曾暗示：「我好鍾意射罰球，罰球係我經常會練習嘅技術，所以我希望得到回報，我個人鍾意射罰球多過射12碼。」曼聯名宿里奧費迪南亦喺自己個youtube頻道分析：「我相信C朗100%會負責12碼，但罰球仍然會係般奴費南迪斯嘅責任，尤其係禁區邊嘅罰球，佢係可以隨心所欲咁射。」