巴舒亞伊翻生　倒戈戰挑機多蒙特

最強博彩盤路過關神器《串績王》：http://win.on.cc/football/　

比利時前鋒巴舒亞伊近年成為「人球」，連續5季被車路士外借放逐，佢今夏被外借到土超比錫達斯，估唔到去到土耳其有重生之勢，上輪聯賽更「開齋」兼梅開二度，周四(16日)凌晨歐聯迎戰多蒙特前打下強心針。

27歲嘅巴舒亞伊上季外借水晶宮冇料到，不過今季轉踢比錫達斯受到重用，開咧3場全部正選，上仗3比0大炒馬拉蒂亞就梅開二度，呢場波亦係巴塞隆拿借將比真歷首演，巴舒亞伊先開紀錄入波正正就係比真歷中場交出致命直線助攻，呢對組合唔可以睇小。

巴舒亞伊喺2018年曾經被外借去多蒙特，今場歐聯倒戈戰前，德甲官網列出多蒙特會贏波5大原因，其中一項就係艾寧夏蘭特同巴舒亞伊嘅分別，有睇小呢位比利時前鋒嘅意思。多蒙特官方twitter賽前出帖話「伊斯坦布爾，我們來了！」巴舒亞伊竟然留咗一對眼睛嘅emoji作回應，似乎係叫多蒙特睇佢表演！