基沙文回歸唔啱踢?施蒙尼重建「河床盛世」

2021年09月14日 14:30
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
馬德里體育會喺夏季轉會窗完結前,先後簽入巴西前鋒馬菲奧斯根夏同借用基沙文,令進攻人手大大增加,不過基沙文上場聯賽首演表現差勁,甚至被質疑破壞馬體會本來嘅進攻體系,教練施蒙尼日前就反駁,透露佢係效法2008年河床嘅黃金盛世。
馬體會上場作客愛斯賓奴,去到補時9分鐘先反勝,回巢首演嘅基沙文正選上陣0次中龍射門加0次對抗成功,只係踢58分鐘就被換走,馬體會冇基沙文後踢得更爽,最後連入2球反勝。基沙文同蘇亞雷斯、安祖哥利亞嘅組合明顯出現混亂,要幫基沙文搵個啱嘅定位唔易,周四(16日)凌晨歐聯主場對波圖,要搵出最佳進攻組合都唔容易。
球隊依家有蘇亞雷斯、基沙文、馬菲奧斯根夏、安祖哥利亞同祖奧菲歷斯5個爭位,施蒙尼就話簽咁多前鋒係有需要:「大家記唔記得08年嘅河床(施蒙尼執教),或者你哋唔記得有咩人,當年球隊有法卡奧、阿歷斯山齊士、艾比奧、保拿洛迪同保羅羅沙里斯,佢哋全部都係出色前鋒,當年河床捧盃唔係偶然。」