盧卡古一箭定江山 車仔歐聯衞冕第1擊贏波

2021年09月15日 10:00
東網電視
更多新聞短片
(Getty Images)
最強博彩盤路過關神器《串績王》:http://win.on.cc/football/ 
周三(15日)凌晨歐聯H組,上屆冠軍車路士主場以1比0擊敗辛尼特,衞冕第1擊旗開得勝!盧卡古又做英雄,頂入全場唯一入球,呢位比利時國腳今季重投車路士之後,上陣4場入4球,效率極高。
開波之前,車路士將帥一齊領取上屆歐聯獎項,主帥杜曹獲頒上屆歐聯最佳教練,最佳球員係佐真奴費路,至於尼高路簡迪獲頒最佳中場,艾度亞文迪獲頒最佳門將。
不過,車路士今場有威脅攻勢並唔多,上半場盧卡古有1次頭槌攻門高出,換邊之後,魯迪格個人表演,由後場開始盤球,長驅直進之後起腳,可惜貼柱出界。
直至69分鐘,車路士終於打開紀錄,艾斯派古達長傳入禁區,由盧卡古頂入,佢繼上場英超對阿士東維拉梅開二度之後,今場又有波入,亦成為首位為3支同球隊喺歐聯入波嘅比利時球員。值得一提,艾斯派古達上場英超都有1次助攻畀盧卡古入波,兩人相當有默契。
賽後杜曹亦大讚呢對好拍檔:「盧卡古頂得非常靚,艾斯派古達傳波亦非常及時,盧卡古身高有優勢,佢對球隊而言,係決定性人物。」