拜仁又大炒巴塞　羅拔佬連續18場入波

最強博彩盤路過關神器《串績王》：http://win.on.cc/football/　

周三(15日)凌晨歐聯E組重頭戲，巴塞隆拿主場對拜仁慕尼黑，又出現一面倒賽果，德甲班霸拜仁慕尼黑再次發揮「巴塞剋星」本色，大勝3比0而回。羅拔利雲度夫斯基個人梅開二度，呢位33歲波蘭國腳已經連續18場正式賽事為拜仁入波，認真犀利。

拜仁雖然作客，但仍然佔盡上風，開賽34分鐘，湯馬士梅拿遠射省中巴塞中堅艾利加西亞，改變方向入網，佢6次對巴塞，射入7球及2次助攻。

換邊之後，穆斯亞拿射門中柱彈出，羅拔利雲度夫斯基補射入網，臨完場前佢再射入1球，送夠3隻蛋畀巴塞。

「羅拔佬」已連續18場正式賽事為拜仁入波，合共轟入28球，佢近33場歐聯亦入咗33球，實在非常誇張。

反觀一向以攻力強勁見稱嘅巴塞隆拿，今場唔止吞3蛋，而且全場射門都唔中目標，球員總跑動距離亦比拜仁少15公里，大敗收場好合理。