祖雲達斯終於開齋！莫拉達做英雄

足球博彩神器，每日重心提供盡在《彩報》：http://win.on.cc/football/　

意甲勁旅祖雲達斯終於識贏波，喺周三(15日)凌晨歐聯H組作客以3比0大勝馬模，今季踢咗4場正式賽事，首次贏波。「敗家仔」艾華路莫拉達今場變身成為英雄，包括博到1球12碼，造就保羅戴巴拿主射入網，跟住自己亦射入1球，祖記逐漸走出C朗離隊後嘅陰霾。

祖雲達斯今季聘請名帥阿里基回巢領軍，但意甲開季3場聯賽都贏唔到，球會被指出售C朗係錯誤決定。祖記今場遇上實力差一截嘅瑞典球隊馬模，趁機重奪失去嘅尊嚴，開波23分鐘，阿歷士辛度接應傳中頂入，打開紀錄。

臨完上半場，祖記閃電連入2球，先係艾華路莫拉達博到1球12碼，由保羅戴巴拿主射入網，轉個頭艾華路莫拉達把握對手防線失誤，射成3比0。

祖雲達斯上場意甲不敵拿玻里，艾華路莫拉達都有1球進帳，佢今場創造2個入球，狀態相當唔錯，祖記進入「後C朗時代」，呢位西班牙國腳孭重飛。