曼城6比3炒RB萊比錫 哥帥喪鬧2大功臣

20210916
東網電視
更多新聞短片
最強博彩盤路過關神器《串績王》:http://win.on.cc/football/ 
歐聯A組周四(16日)凌晨激戰,上屆亞軍曼城主場以6比3大破德甲勁旅RB萊比錫,雖然比數上好似強弱懸殊,不過RB萊比錫「打不死」精神亦令曼城受咗唔少苦,哥迪奧拿喺比賽期間更曾經瘋狂大鬧2位入球功臣馬列斯同基亞利殊,相當肉緊。
曼城16分鐘就有尼敦阿基角球頂入先開紀錄,28分鐘再藉對手擺烏龍贏到2比0,正當球迷以為曼城可以輕鬆贏波,RB萊比錫就一直死咬唔放,42分鐘尼干古頭槌追成1比2,但曼城喺完半場前再由馬列斯射入12碼,半場領先3比1。
兩隊下半繼續入球Show,尼干古51分鐘再為客隊追成2比3,5分鐘後基亞利殊入靚波為曼城領先4比2,「死唔斷氣」嘅RB萊比錫73分鐘再追多球,尼干古個人大演帽子戲法。曼城後防祖奧簡些路75分鐘遠射建功拉開5比3,RB萊比錫隨後有安祖利奴2黃1紅牌逐,終於都返魂乏術,曼城完場前5分鐘由加比爾捷西斯錦上添花贏6比3。
曼城領隊哥迪奧拿今場非常肉緊,下半場更捉住馬列斯同基亞利殊激動大鬧,佢賽後表示:「我哋半場講過要點樣做,但佢哋冇聽我指示,呢啲爭執經常會發生。」今場有1入波1助攻嘅基亞利殊賽後亦透露:「(哥帥發火)係關於防守上嘅問題,我唔會講太深入,因為下仗可能都要咁踢,哥迪奧拿就係呢種對攻守都好有要求嘅領隊,我當然會細心聽佢指導。」