羅馬開季6連勝　摩連奴潑冷水：黑暗將至

足球博彩神器，每日重心提供盡在《彩報》：http://win.on.cc/football/　

意甲勁旅羅馬今季喺摩連奴執教後脫胎換骨，周五(17日)凌晨歐協聯C組賽事，主場出擊以5比1大炒索菲亞中央陸軍，開季6場比賽全部贏晒，不過摩連奴賽後就唔係特別興奮，直指球隊仲有好多問題，仲預言將會出現嘅「黑暗時間」先至係球隊最大考驗。

意甲排緊「一哥」嘅羅馬今場強陣出擊，雖然10分鐘率先失波，但憑住羅倫素柏歷堅尼梅開二度、艾沙拉維、基安盧卡文仙尼同譚美阿巴謙各建一功，輕輕鬆鬆大勝對手5比1。摩連奴上任後6連勝，係羅馬史上第3次以「6連勝」開局，之前2場係13/14同14/15球季。

雖然成績理想，但摩連奴賽後就非常冷靜：「我唔滿意今場嘅表現，唔係話球員踢得好差，但亦唔係5比1呢個比數睇落咁好。球季係一場馬拉松賽事，6連勝並唔代表你會贏60場，當黑暗時刻來臨，先至係對球隊最大考驗，而呢個黑暗時刻係一定會出現，當然我對球隊呢段日子嘅表現係滿意。」