戴定頭盔　杜曹稱車路士未到最佳狀態

足球博彩神器，每日重心提供盡在《彩報》：http://win.on.cc/football/　

車路士今季英超4戰取得3勝1和，上場歐聯亦贏波，但領隊杜曹表示，球隊仍然未到最佳狀態，可以踢得更好。車路士將於周日(19日)晚英超作客勁敵熱刺，杜曹似乎想戴定頭盔，一旦失分都有得賴。

杜曹話：「我冇期望球隊可以喺9月達到最佳狀態，因為新冠肺炎疫情影響下，季前備戰工作非常困難，依家最重要係必須具備一定競爭力，唔可以落後畀主要競爭對手。我唔係話球員表現差，而係可以踢得更好，我哋已經成為一支難以被擊敗嘅球隊，取得勝利可以營造好氣氛，亦要接受批評。」

車路士將於周日(19日)晚英超作客熱刺，合演「倫敦打吡」，杜曹非常期待雙方射手盧卡古同哈利卡尼交鋒：「佢哋兩個可以經常入波，而且往往係決定性入球，如果哈利卡尼可以上陣，我哋必須想辦法凍結佢。」

另外，杜曹透露中場尼高路簡迪嘅傷勢已經冇大礙，但翼鋒基斯甸普列錫仍在養傷。