迪斯高後備上陣都起孖　國米大炒博洛尼亞

最強博彩盤路過關神器《串績王》：http://win.on.cc/football/　

周日(19日)凌晨意甲，上季冠軍國際米蘭發揮王者本色，主場以6比1大勝博洛尼亞，35歲老將迪斯高今場後備上陣，仍然可以梅開二度，佢今季意甲上陣4次有3球進帳，證明自己寶刀未老，足以頂替盧卡古離隊之後嘅位置。

國米今場火力全開，前中後三線球員都有波入，開波6分鐘由射手拿達路馬天尼斯近門射入，跟住中堅史堅尼亞、中場尼高路巴列拿各建一功，上半場領先3比0。

換邊之後，馬泰斯雲仙奴為國米射成4比0，其後迪斯高連入2球，博洛尼亞踢到86分鐘先至破蛋。

賽後國際米蘭教練施蒙尼恩沙基特別稱讚今季新加盟嘅荷蘭國腳杜費斯，指呢位右翼衞迅速融入球隊，表現令人驚喜。杜費斯今場貢獻1次助攻，攻守兼備，成功填補阿舒拉夫轉投巴黎聖日耳門之後嘅空缺，成為國米右路進攻泉源。