曼城「5+5」奇陣有料到　6比1大炒韋甘比

足球博彩神器，每日重心提供盡在《彩報》：http://win.on.cc/football/　

力爭英聯盃5連冠嘅曼城，周三(22日)凌晨第3圈主場迎戰韋甘比，領隊哥迪奧拿用「5+5」政策排出新舊融合陣容，後防線同中場用盡5個17歲至18歲嘅青年軍球員，攻擊線就用奇雲迪布尼、史達寧、菲爾科頓、馬列斯同費倫托利斯5大球星掛帥，最終順利大勝6比1晉級。

曼城今場呢個「頭重腳輕」陣容，開局要時間適應，22分鐘更加意外先失守，不過曼城企穩陣腳後就展開超班火力，半場前已由奇雲迪布尼、馬列斯同菲爾科頓建功反勝3比1，下半場費倫托利斯同馬列斯各入1粒，加上後備上陣嘅小將高爾龐馬都有斬穫，輕鬆大勝6比1完場。

哥迪奧拿賽後表示：「我好鍾意呢啲比賽，見到青訓球員有好表現係非常特別，我知道佢哋可以被委以重任，曼城有一批好出色嘅年輕球員，或者佢哋將來可以好似菲爾科頓咁成功，呢一點就要睇佢哋之後造化。」