好波有罪！柏基達玩花式食牌　尼馬斥可悲

最強博彩盤路過關神器《串績王》：http://win.on.cc/football/　

太好波都有罪？周四(23日)法甲里昂主場3比1贏特魯瓦一仗，主隊嘅中場盧卡斯柏基達喺比賽尾段，施展一招「神龍擺尾」花式過人，點知球證竟然認為呢個舉動係不君子行為，向盧卡斯柏基達出示黃牌。同樣鍾意Show Off嘅巴西隊友尼馬亦立即聲援，直指呢個情況好可悲。

里昂對特魯瓦一仗係先失波嗰隊，但下半場大反擊連入3球，盧卡斯柏基達喺87分鐘鎖定勝局後，完場前決定玩花式娛樂主場球迷，佢喺底線用雙腳夾波，再施後腳想挑過對手，雖然個波撞到人未能成功，但球證就吹停比賽，並向盧卡斯柏基達出示黃牌，搞到呢位巴西國腳O晒嘴。

佢哋巴西國家隊隊友尼馬感同身受，事關尼馬之前亦試過同樣情況食牌牌，尼馬喺IG發文話：「呢個場面好可悲，因為嘗試扭過人而食黃牌，呢啲技術係踢波方法之一，無論喺邊個位置或者咩時間施展都冇問題。老實講，足球嘅美麗正消失，趁依家仲未死晒，大家好好享受。」