魯迪格合約就完　拜仁40萬鎊周薪搶人

最強博彩盤路過關神器《串績王》：http://win.on.cc/football/　

車路士中堅魯迪格自2017年加盟後，評價一直都唔係咁好，杜曹上任前更加成為大後備，不過呢位28歲德國國腳近期表現優異，喺3中堅陣式中成為後防核心人物，不過佢同車路士嘅合約到今季季尾完結，據報拜仁慕尼黑、巴黎聖日耳門、祖雲達斯同皇家馬德里都準備明年免費誓人。

英國《每日郵報》消息指，魯迪格同車路士續約談判未有進展，如果續約估計都要20萬鎊周薪，但拜仁慕尼黑同巴黎聖日耳門2大豪門，就願意出到40萬鎊周薪利誘佢加盟，其中以拜仁慕尼黑最為積極，重返德甲亦對魯迪格有一定吸引力。

拜仁教練拿高斯文早前就公開表示，佢對魯迪格非常欣賞：「我依家以一個球迷身份談論魯迪格，佢最近嘅進步非常巨大，杜曹幫助佢好多，1年前佢仲係車路士後備，依家已經係球隊最重要球員。」魯迪格日前亦表示下一份合約係佢足球生涯最重要決定，所以會用更多時間好好思考。