阿仙奴日本勢力抬頭　伊恩胡禮大讚

最強博彩盤路過關神器《串績王》：http://win.on.cc/football/　

阿仙奴近年簽日本球員都係失敗居多，稻本潤一、宮市亮、淺野拓磨都只係過客，不過今季就難得有「日本勢力」抬頭，日本國腳富安健洋加盟後表現大獲好評，就連女子隊都有日本女足球星岩渕真奈大放異彩！

富安健洋喺轉會窗死線日由博洛尼亞加盟，立即成為球隊正選右閘，2場聯賽都有出色表現，連名宿伊恩胡禮都大讚：「富安健洋係個極精明嘅收購，佢表現得非常之好，感覺上好似冇人可以過得到佢！」阿仙奴上場對住出名硬淨嘅般尼，富安健洋5次高空同地面爭搶全部贏晒，完全冇適應英超嘅問題。

除咗富安健洋之外，阿仙奴女子隊今季亦喺阿士東維拉簽入日本中場岩渕真奈，呢位日本女足巨星今季踢4場歐聯入3球，對燕豪芬嘅窄角度世界波更獲選為阿仙奴8月份最佳入球！富安健洋日前同岩渕真奈更喺阿仙奴訓練基地見面兼合照，2人話會為對方打氣添！