曼市雙雄「自殺式」搶人　爭簽迪比利

最強博彩盤路過關神器《串績王》：http://win.on.cc/football/　

曼聯同曼城由場內鬥到場外，西班牙傳媒指曼聯已經派人接觸巴塞隆拿翼鋒奧士文尼迪比利嘅經理人，希望明年夏天簽入呢位到時自由身嘅24歲法國國腳，由於曼城都有興趣簽奧士文尼迪比利，曼市雙雄勢必展開一場搶人大戰。

雖然曼聯今季已經簽入查頓辛祖，但呢位英格蘭國腳表現令人失望，所以又開始物色新翼鋒，之所以睇中奧士文尼迪比利，除咗佢本身有一定實力之外，最重要係佢將於明夏約滿，曼聯可以免轉會費簽入佢。

不過，曼城領隊哥迪奧拿亦非常欣賞奧士文尼迪比利，早前傳出希望用史達寧向巴塞交換奧士文尼迪比利，出手比曼聯更加有誠意。

巴塞隆拿2017年以1億歐元向多蒙特收購奧士文尼迪比利，但效果令人失望，呢位快翼除咗發揮未如理想之外，紀律亦欠佳，曾經遲到操練，而且經常受傷，上年更因傷長抖5個月。

無論曼聯或者曼城，邊隊簽到奧士文尼迪比利，對球隊都未必係好事。