沙拿入紅軍生涯英超100球 利物浦升榜首

20210926
東網電視
更多新聞短片
(Getty Images)
最強博彩盤路過關神器《串績王》:http://win.on.cc/football/ 
周日(26日)凌晨英超尾場上演入球騷,利物浦作客被新升班球隊賓福特逼和3比3,但由於曼聯同車路士都輸波,利物浦以1分優勢升上榜首。穆罕默德沙拿今場射入1球,效力紅軍生涯累積入第100個英超入球,寫下里程碑。
兩隊近32年來首次交鋒,賓福特對上1次贏利物浦,更加已經係1938年,但呢支新升班球隊並唔示弱,上半場27分鐘由中堅賓諾克把握門前大漏,射入空門打開紀錄。不過4分鐘之後,迪亞高祖達接應右路傳中頂入,為利物浦扳平1比1。
下半場雙方繼續鬥攻,法賓奴長傳入禁區,穆罕默德沙拿近門射入,為紅軍反超前,亦係佢加盟紅軍以來第100英超入球。呢位埃及國腳僅上陣151次,就達到百球大關,成為利物浦史上喺聯賽最高效率百球射手。
賓福特之後靠真拿達把握門前混戰頂入成2比2,轉個頭利物浦中場新星居迪斯鍾斯射入世界波,再度為球隊領先。
踢到82分鐘,賓福特透過1次罰球攻勢製造門前混亂,由後備上陣嘅尤尼韋沙射成3比3完場。賓福特今季曾經擊阿仙奴,依家又打和利物浦,表現令人驚喜。