曼聯防線2位大將受傷　或缺陣歐聯

最強博彩盤路過關神器《串績王》：http://win.on.cc/football/　

曼聯喺周六(25日)晚英超，唔止0比1不敵阿士東維拉，更加損兵折將，2位防線主將哈利馬古尼、勞基梳爾都受傷退下火線，可能缺陣周四(30日)凌晨歐聯分組賽主場對維拉利爾，令紅魔鬼雪上加霜。

左後衞勞基梳爾上半場34分鐘，受傷退下火線，英國《太陽報》指呢位英格蘭國腳大腿肌肉受傷，勞基梳爾一向係「玻璃腳」，試過多次受傷長抖，直到近2、3年先至恢復較佳水平，今次再受傷，情況難免令人擔憂。

至於中堅哈利馬古尼踢到66分鐘傷出，結果又要用番以多甩漏見稱嘅域陀連迪路夫入替佢。賽後曼聯領隊蘇斯克查承認2位傷兵情況欠佳：「佢哋睇來唔多好，至於踢唔踢到周中歐聯，仲需要等待檢查報告先至知。」

曼聯今屆首場歐聯不敵年青人，如果周四(30日)凌晨對維拉利爾，再失分嘅話，出線形勢就會告急。