巴塞貼錢送走古天奴　倫敦雙雄爭住要

最強博彩盤路過關神器《串績王》：http://win.on.cc/football/　

西甲勁旅巴塞隆拿近年陷入財困，被逼放走美斯、基沙文等多位高薪球星，西班牙傳媒指巴塞清貨行動陸續有來，計劃明年1月轉會市場重開後，將中場菲臘比古天奴外借去其他球隊，以節省薪酬支出，據悉英超倫敦雙雄阿仙奴、熱刺都有意借用呢位29歲巴西國腳。

菲臘比古天奴曾於2019/20年球季被外借去拜仁慕尼黑，上季返回巴塞隆拿，僅上陣14次，今季亦長居後備，加上17歲新星加維今季冒起，進一步減少菲臘比古天奴嘅存在價值。

古天奴年薪高達1,200萬歐元，成為巴塞財政包袱，巴塞為咗盡快送走古天奴，甚至願意將佢外借出去之後，繼續承擔一半人工，以吸引其他球隊借用。

阿仙奴、熱刺都有意借用菲臘比古天奴，因為佢踢過利物浦，當年有出色表現，早已適應英超風格，可以「即食」，特別係熱刺攻力弱，今季頭5場英超僅入3球，希望借入古天奴之後，可以提升火力。兵工廠為打上前列位置，亦有增兵需要。