卡雲尼想走　巴塞隆拿提出1月借用

最強博彩盤路過關神器《串績王》：http://win.on.cc/football/　

C朗拿度今個夏天強勢回歸曼聯，理所當然成為球隊王牌球員，不過同樣今夏續約嘅烏拉圭前鋒卡雲尼，就淪為球隊大後備。據英國《每日快報》報道，卡雲尼對自己嘅情況並唔滿意，希望盡快離隊尋求正選位置，而急需前鋒嘅巴塞隆拿已提出1月份借用方案。

報道指卡雲尼今夏答應同曼聯續約，其中一個條件係成為球隊主力，尤其世界盃決賽周明年舉行，卡雲尼唔願意接受長坐冷板命運，但佢今季喺曼聯各項賽事入面，只係2次後備入替踢咗合共46分鐘，明顯喺C朗拿度在陣情況下，卡雲尼都唔會有機會成為正選，更何況另一前鋒拉舒福特即將復出，箭頭位置爭逐會更加激烈。

《每日快報》消息指，巴塞隆拿已經瞄準卡雲尼，並開始商討1月份借用嘅方案，由於卡雲尼同曼聯合約只係去到季尾，如果曼聯同意借用等同將卡雲尼放走，而關鍵係34歲嘅卡雲尼去意堅決，「紅魔鬼」唔排除會做順水人情畀佢離開。