驚天大冷門！舒列夫絕殺皇馬爆25倍客W

最強博彩盤路過關神器《串績王》：http://win.on.cc/football/　

周三(29日)凌晨歐聯分組賽D組爆出驚天大冷門，今季首次出戰歐聯嘅摩爾多瓦球隊舒列夫，作客以2比1絕殺13屆冠軍皇家馬德里，爆出25倍客W賽果。舒列夫目前喺小組2戰全勝排榜首，力壓皇家馬德里同國際米蘭兩大名牌，賽前相信冇幾多人估到。

舒列夫係摩爾多瓦19次聯賽冠軍，雖然係歐聯常客，但每次都喺外圍賽出局，今屆佢哋首度躋身分組賽，首仗2比0贏薩克達已展示出反擊威力，今場作客皇馬更加喺25分鐘由耶舒巴耶夫頭槌領先；皇馬之後一直控制大局，65分鐘由雲尼斯奧斯祖利亞博到12碼，賓施馬操刀追成1比1。正當皇馬以為可以一鼓作氣反勝，舒列夫喺完場前1分鐘再有驚喜，菲爾禁區頂窩利抽射貼柱而入，為舒列夫拎到呢場神奇勝仗。

皇馬教練安察洛堤賽後表示：「呢場比賽我哋唔應該輸，一啲微小細節令球隊付出代價，一個反擊、一個傳中令球員措手不及，引發最後入波個界外球，我哋本來可以做得更好，球隊今場有逼搶、有射門，但比賽有時就由運氣主宰。」